Azərbaycan Dillər Universitetinin (ADU) rəhbərliyi və kollektivi Zaqatala şəhər Şıxəli Qurbanov adına 3 nömrəli tam orta məktəbini ziyarət ediblər. 

Görüş zamanı ADU-nun fəaliyyəti, beynəlxalq əlaqələri, tələbələr üçün yaradılan imkanlar, eləcə də universitetə qəbul qaydaları haqqında ətraflı məlumat verilib.

Məktəb şagirdləri və müəllim kollektivi ilə interaktiv müzakirələr aparılıb və onların sualları cavablandırılıb. Səfərin əsas məqsədi orta məktəblərlə universitet arasında əməkdaşlığı gücləndirmək, şagirdləri ali təhsil imkanları barədə məlumatlandırmaq və onların gələcək ixtisas seçimində dəstək göstərməkdir.

Qeyd edək ki, görüşdə ADU Tələbə Həmkarlar İttifaqı Komitəsi tərəfindən təşkil olunan intellektual oyunun qalibləri mükafatlandırılıb. Həmçinin, 

şagirdlərə Azərbaycan Həmkarlar İttifaqları Konfederasiyası (AHİK) tərəfindən hazırlanmış xüsusi hədiyyələr təqdim olunub.

14-18 aprel tarixlərində Azərbaycan Həmkarlar İttifaqları Konfederasiyasının (AHİK) üzv təşkilatı Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsinin və Azərbaycan Əmək və Sosial Münasibətlər Akademiyasının (AƏSMA) birgə təşkilatçılığı ilə keçirilən “Əmək qanunvericiliyinin tətbiqi problemləri” mövzusunda keçiridiyi təlimlər başa çatıb. Beş gün davam edən təlimdə ATİAHİ-nin üzv təşkilatların sədrlərinə təlimçi Ruslan Vəliyev, Qaya Əliyev, Sadiq Bağırov, Mirhüseyn Həbibli “Əmək qanunvericiliyinin tətbiqi problemləri” ilə bağlı təlim keçiblər.

Təlimin məqsədi iştirakçıların əmək qanunvericiliyi sahəsində bilik və bacarıqlarının artırılması, qanunvericiliyin praktiki tətbiqi zamanı yaranan çətinliklərin müzakirəsi və onların həll yollarının müəyyənləşdirilməsini təmin etməkdir.

Sonda təlimlərdə iştirak edən komitə sədrlərinə sertifikatlar təqdim edilib.

18 aprel 2025-ci il tarixində Təhsil Tələbə Krediti Fondu (TTKF) ilə Azərbaycan Təhsil İşçiləri Azad Həmkarlar İttifaqı (ATİAHİ) arasında Anlaşma Memorandumu imzalanıb. Memorandum qarşılıqlı səmərəli əlaqələrin qurulması, təhsil tələbə kreditlərindən yararlanmış tələbə və məzunların təcrübə mübadiləsinin təşkili və digər sahələrdə əməkdaşlığın genişləndirilməsi istiqamətində birgə fəaliyyəti nəzərdə tutur. 

Mərasimdə TTKF-nin İdarə Heyətinin sədri Bəhruz Əzimov çıxış edərək, Fondun əldə etdiyi nəticələr barədə məlumat verib. O bildirib ki, 2021-ci ildən fəalliyyət göstərən Fond artıq 4 ildir ki, aztəminatlı ailələrin övladlarına təhsil almaqda dəstək göstərir, sosial bərabərliyi təşviq edir və təhsil imkanlarını genişləndirmək məqsədilə fəaliyyət göstərir. Qeyd olunub ki, bu dövr ərzində Fondun elektron portalına 67 mindən çox müraciət daxil olub, 53 mindən artıq təhsil tələbə krediti müqaviləsi rəsmiləşdirilib. 

ATİAHİ Respublika Komitəsinin sədri Araz Paşayev öz çıxışında Fondun fəaliyyətini yüksək qiymətləndirib. O vurğulayıb ki, tələbələrə göstərilən dəstək onlara təhsilə çıxış imkanı verməklə yanaşı sosial rifahının yüksəldilməsinə də əhəmiyyətli şəkildə töhfə verir. Sədr imzalanan Memorandumun gələcəkdə daha genişmiqyaslı əməkdaşlıqlara və layihələrin icrasına imkan yaradacağını vurğulayıb. 

Bahruz Əzimov əlavə edib ki, TTK-dan yararlanmış tələbələrə maliyyə dəstəyi ilə yanaşı, fond eyni zamanda əməkdaşlıq etidiyi qurumlarla birgə onların əmək bazarına inteqrasiyası üçün müxtəlif təlim və inkişaf proqramları həyata keçirir. Bu istiqamət üzrə dövlət və özəl sektorla qurulan tərəfdaşlıqlar mühüm rol oynayır.

Qeyd edək ki, qarşılıqlı səmərəli əlaqələrin qurulmasına xidmət edəcək Memorandum könüllü və təcrübə proqramları, o cümlədən seminar və təlimlər keçirilməsinin dəstəklənməsi, tələbə və məzunların ixtisaslarına uyğun təcrübə proqramlarına cəlb edilməsi, müvafiq sahə üzrə vakansiyalar yaranarsa təhsil tələbə kreditlərindən yararlanmış təhsilalanlara və məzunlara üstünlük verilməsi məqsədilə birgə fəaliyyətin təşkilini nəzərdə tutur.